ماڵپەڕێکی تایبەت بۆ پەروەردەبوون

ناو لە زمانی کوردیدا / اسم در زبان

ڕێزمانی کوردی,دستور زبان کردی,ناو لە زمانی کوردیدا,اسم در زبان کردی,جۆرەکانی ناو,ڕێزمانی کوردی سۆرانی,فێرکاریی ڕێزمانی کوردی,

بۆ شارەزابوون لە ناو وەکوو یەکێک لە بەشەکانی ئاخاوتن، پێویستە وەڵامی ئەم پرسیارانەی خوارەوە بدەینەوە، بەم شێوەی خوارەوە: ۱ـ ناو چییە؟ ۲ـ ناو لە ڕووی ژمارەوە (

ناو لە زمانی کوردیدا / اسم در زبان

ماڵپەڕێکی تایبەت بۆ پەروەردەبوون

ناو (اسم) وێنەکە گەورەتر ببینە
مژاری: 63
کورتێک لە بابەتەکە :

بۆ شارەزابوون لە ناو وەکوو یەکێک لە بەشەکانی ئاخاوتن، پێویستە وەڵامی ئەم پرسیارانەی خوارەوە بدەینەوە، بەم شێوەی خوارەوە: ۱ـ ناو چییە؟ ۲ـ ناو لە ڕووی ژمارەوە (
🔸بەردەوام🔸

بۆ شارەزابوون لە ناو وەکوو یەکێک لە بەشەکانی ئاخاوتن، پێویستە وەڵامی ئەم پرسیارانەی خوارەوە بدەینەوە، بەم شێوەی خوارەوە:

۱ـ ناو چییە؟

۲ـ ناو لە ڕووی ژمارەوە ( تاک و کۆ و کۆمەڵ) چۆنە؟

۳ـ ناو لە ڕووی ناسینەوە چەند جۆرە؟ چۆن بیناسینەوە؟

٤ـ ناو لە ڕووی ڕەگەزەوە چەند جۆرە؟

٥ـ ناوی لە ڕووی ناوەرۆکەوە چەند جۆرە؟

٦ـ ناو لەڕووی هەبوونەوە چەند جۆرە؟

٧ – ناو لە ڕووی پێکهاتەوە چەن جۆرە؟

٨ـ ناو لە ڕووی ئەرکەوە، چەند ئەرک دەبینێت؟

 

تێبینی//

هەموو ئەمانە بەئاسانترین ڕێگە و بەتێبینییەوە بۆ ناسینەوەیانباس دەکرێن.

یەکەم/ ناو چییە؟

ناو بەشێکە لە بەشەکانی ئاخاوتن، واتا کەرەستەیەکە لە کەرەستەکانی قسەکردن، کە بۆ ناو لێنانی گیاندار یان بێگیانێک، شتێک، کەسێک، بیرێک، جێیەک، ڕووەکێک، بەکار دێت، تەنیا بۆ مەبەستی ناسینەوەی شتەکان و لەیەکتری جیاکردنەوەیان، بۆ نموونە: ( شیرین، عەلی، ئاسۆ، گوڵ، شار، دار، پێنووس، هێمن، ... هتد).
پ/ لە ڕستەی ( مەم و زین داستانێکە، کە ئەحمەدی خانی نووسیویەتی) ناوەکانی ئەم ڕستەیە دەستنیشان بکە:
وەڵام/ ( مەم، زین، داستان، ئەحمەد، خان)
دووەم/ ناوی لە ڕووی ژمارەوە:
لە زمانی کوردیدا، هاوشانی زمانی ئینگلیزی، ناو لە ڕووی ژمارەوە دوو جۆرە، بەم شێوەیەی خوارەوە:
۱ـ ناوی تاک:
بەم ناوانە دەوترێ کە بۆ تاکەکەسێک یان تاکەشتێک بەکار دەڕوات. وەکوو: پیاو، ژن، پشیلە، پێنووس، چیا، کۆتر، وشە، قسە  و ...
لە زمانی کوردیدا دوو نیشانەی ڕێزمانی هەیە، بۆ ئەوەی بە ناوێک بڵێی تاکە، نیشانەکان بریتین لە (ەکە، ێک)، لە هەمانکاتدا ئەو نیشانەیە نیشانەی ناسراوی و نەناسراویشە، واتە هەر ناوێک نیشانەی ( ەکە) پێوە بوو، ئەوا هەم تاکە، هەم ناسراوە، هەر ناوێکیش ( ێک) ی پێوەبوو هەم تاکە، هەم نەناسراوە، بەم شێوەیە:
باخچە + ەکە= باخچەکە                 ناوێکی تاکی ناسراوە
پەرتووک + ەکە = پەرتووکەکە        ناوێکی تاکی ناسراوە  
چیرۆک + ێک = چیرۆکێک            ناوێکی تاکی نەناسراوە
شار + ێک = شارێک                     ناوێکی تاکی نەناسراوە

پ/ لەم ڕستانەی خوارەوە ناوی تاکی ناسراو  و نەناسراو جیا بکەوە:
۱ـ نالی کە شاعیرێکی کلاسیکە لە ساڵی ۱٨۰۰ لەدایک بووە.
۲ـ شارێکی وەک ڕانیە بوو، ڕاپەڕینی ئەنجام دا.
۳ـ تکایە! پەرتووکەکە بخوێنەوە.
 
 
۲ـ ناوی کۆ:
بەم ناوانە دەوترێ که بۆ کۆمەڵێک کەس یان شت بەکار دێن. 
لە زمانی کوردیدا بە دوو شێوەیە ناو کۆ دەکرێتەوە، بەم شێوەیە:

*شێوەی یەکەم
کە بە شێوەی سەرەکی دادەنرێت، هەر کاتێک ناو، نیشانەی ( ان) ی پێوە بوو، ئەوە نیشانەی ئەوەیە ناوەکە کۆیە، بە مەرجێک (ان)، بەشێک نەبێت لە ئەسڵی وشەکە، بۆ نموونە:
کوڕ+ ان= کوڕان      ناوێکی کۆیە
کچ+ ان= کچان       ناوێکی کۆیە
تێبینی:
( سەیران، گۆران، دارەوان، میهرەبان، ...هتد) ئەو ناوانە کۆ نین، چونکە ـ ان ـ بەشێکن لە ئەسڵی وشەکە.
 
*شێوەی دووەم
کە بە شێوە و  نیشانەی ناسەرەکی ناو دەنرێت، کە گومانیان لەسەرە لە بنەڕەتدا کوردی بن، بەڵام ئەمڕۆ لە کوردیدا جێگەیان گرتووەو بەکاردەهێندرێن، کە بریتین لە ( ات، جات، گەل، هات، ەها) بۆ نموونە:
باخ + ات = باخات
میوە + جات = میوەجات
مێ + گەل = مێگەل
دێ + هات = دێهات
ساڵ + ەها = ساڵەها
 
تێبینی:
هەر کاتێک ناوێک بە بزوێن کۆتایی هاتبێت، ئەوا ڕاستەوخۆ ـ ان ـ وەرناگرێ، بەڵکو یان ـ یـ ـ دەکەوێتە نێوانیان، بۆ نموونە:
چرا + یـ + ان = چرایان
یان ـ ە ـ تێدەچێت، بۆ نموونە
قوتابخانە- ە + ان = قوتابخانان
 
چەند خاڵی گرنگ
- ئەم نیشانە سەرەکییە دەچێتە کۆتایی ناوەکان و ئەگەر ناوەکە بە پیتێکی بزوێن کۆتایی هاتبێت ئەوە چەند شت ڕوو دەدات: ئەگەر بە " ا، ۆ (ئی) ، ێ '' کۆتایی هاتبێ ئەوە پیتە(ی) ی دێتە نێوان وشەکە و پیتە بزوێنەکە. بۆ نموونە:
      ماسی + ی + ان = ماسیـیـان                مامۆستـا + ی + ان = مامۆستایان      
     درۆ + ی + ان = درۆیـان                      جـێ + ی + ان = جێـیان

-  بەڵام ئەگەر بە "وو " کۆتایی هاتبێت ئەوە بەزۆری "و"  دێتە بەینی وشەکە و نیشانە سەرەکییەکە هەرچەند هەندێ ناوچە بۆ ئەم وشانەش هەر "ی" ی دادەنێن بەڵام بەزۆری "و''  دێت. بۆ نموونە:
توو + و + ان = توووان ( بەڵام لەبەر جوانی وشەکە و ڕێنووسی یەکگرتوو دەنووسرێ: تووان)
        دڕوو + و + ان = دڕووان         موو + و + ان = مووان         بەڕوو + و + ان = بەڕووان
 
-  ئەگەر بە " ە '' کۆتایی هاتبێت ئەوە " ە " تێ دەچێت.  وەکوو:                  
     وشە + ان = وشان       ئەستێرە + ان = ئەستێران       پەپوولە + ان = پەپوولان
هەندێ جار بەهۆی نیشانەی ناسەرەکی دەبنە کۆ وەکوو نیشانەکانی " ات، ها، هات، گەل" دەگرن. بۆ نموونە:
    باخ + ات = باخات          دێ + هات = دێهات             قسە + ها = قسەها    
    گوڵ + ها = گوڵها            ساڵ + ها = ساڵها              کوڕ+ گەل = کوڕگەل
   مێ + گەل = مێگەل          سەگ + گەل = سەگگەل        دار + گەل = دارگەل
 
تێبینی:
هەر ناوێک نیشانەی ( ەکان)ی پێوە بوو ، ئەوا ناوێکی کۆی ناسراوە، بۆ نموونە:
شارەکان، گوندەکان، مامۆستایەکان، قوتابخانەکان، پەرتووکەکان، میوەکان، ... هتد.
٣-ناوی کۆمەڵ (کۆناو): بەو ناوانە دەوترێت کە لە ڕواڵەتدا تاکن بەڵام لە ناوەڕۆکدا کۆمەڵ. واتا ناوێکە کە نیشانەی کۆ واتە "ان، گەل، ات، ها، ەیل"ی نییە بەڵام مانایەکەی کۆیە.
وەک:  وڵات، هۆز، گەل، نەتەوە، پۆل، لەشکر، سوپا، مێگەل، گاڕان، خێڵ، قەوم، میلەت، بنەماڵە، خەڵک،  و...
شار، دێ، ڕەگەز و ... ئەمانە ناوی کۆمەڵ نین چون شار ناوی شوێنە و واتای کۆمەڵی نییە.
 
 
سێیەم/ ناو لە ڕووی ڕەگەزەوە
 
لە زمانی کوردیدا ناو لە ڕووی ڕەگەزەوە، چوار جۆرە، بەم شێوەیە:
۱ـ ناوی ڕەگەزی نێر: ناوی نێر چوار شێوەی هەیە، بەم شێوەیەی خوارەوە:
 *  ناوی تایبەت بە کوڕان:  هێمن، هەژار، ئاسۆ، ئالان، ئاکۆ، ... هتد.
*  ناوی پیشەی نێر:  نانەوا، فیتەر، گاوان، ... هتد.
تێبینی:
زۆر جار ئاساییە پیشەی نێر، ڕەگەزی مێش ئەنجامی بدات، بەڵام هەر بە ناوی پیشەی نێر دەمێنێتەوە، چونکە لە بنەڕەتدا پیشەکە پیشەی نێرە.
*  ناوی گیانداری نێر ( باڵندە ، ئاژەڵ):  کەڵەشێر، گاجووت، کەر، ئێستر، یەکانە، ... هتد.
یەکانە: نێرەی بەرازە.
*  ناوی کەسانی نێر:  خاڵ، مام، کوڕە پور، ئامۆزا، باپیرە، باوک، پسمام... هتد.

۲ـ ناوی ڕەگەزی مێ:  ناوی مێ چوار شێوەی هەیە، بەم شێوەیەی خوارەوە: 
*  ناوی تایبەت بە کچان:  هێرۆ، هێشو، سارا، ساکار، هاوژین، ... هتد.
*  ناوی پیشەی نێر: چێشتلێنەر، جلشۆر، تەشیڕێس، ... هتد.

تێبینی:
زۆرجار ئاساییە پیشەی مێ، ڕەگەزی نێر ئەنجامی بدات، بەڵام هەر بە ناوی پیشەی مێ دەمێنێتەوە، چونکە لە بنەڕەتدا پیشەکە پیشەی مێیە.
*  ناوی گیانداری مێ ( باڵندە ، ئاژەڵ):  مریشک، مانگا، ماکەر، ماین، مالۆس، ... هتد.
مالۆس: مێیەی بەرازە.
*  ناوی کەسانی مێ: خاڵۆژن، ئامۆژن، کچەپور، دۆتمام، داپیرە، نەنک، دایک، ... هتد.
 
 
۳ـ  ناوی دوو لایەن:
ئەو ناوانەن کە بۆ هەردوو ڕەگەز بەکار دێت، بەم شێوەیە ( قوتابی، خوێندکار، مامۆستا، دکتۆر، ئامۆزا ( لە کورمانجی خواروو).
٤ـ ناوی بێلایەن: ئەو ناوانەن، کە هیچ کام لە ڕەگەزی نێر و مێیان تێدا نییە، بۆ نموونە، دار، بەرد، پەرتووک، کورسی، ... هتد.
کەواتە، نابێت بۆ مامۆستای ژن وشەی ( ست) بەکاربێت، هەروەها بۆ دکتۆری ژن ( دکتۆرە) بەکار بێت، لەبەر ئەم هۆکارانەی خوارەوە:
۱ـ مامۆستا  لە زمانی کوردی دوولایەنە و بۆ هەردوو ڕەگەز بەکاردێت، وشەی(ست)عەرەبییە واتە باجی.
۲ ـ دکتۆر بۆ هەردوو ڕەگەز بەکاردێت و ( دکتۆرة) هەڵەیە، چونکە تائی تەئنیسی ساکینە (ة) لە زمانی کوردیدا بوونی نییە.

چوارەم:  ناو لە ڕووی ناوەرۆکەوە (ناوی گشتی و تایبەت و کۆمەڵ)

-١-گشتی:  ناوێکە لە دەرەوە نموونەی زۆرن یانی شتێکە کە زۆر وەک ئەو دەچێت و وەک ئەو هەیە. 
وەک:  پیاو، ژن، ئاسن، کتێب، مزگەوت، گوڵ، مرۆڤ، میز، هۆز، وڵات و.....
 
تێبینی:  ناوەکانی گشتی " تاک یان کۆ یا ناسراو و نەناسراو"  دەکرێ چونکە وەک ئەو زۆرن بۆیە تاک یان کۆ دەبن و دەتوانین ناسراو و نەناسراوی بکەین.

٢- ناوی تایبەت:  ناوێکە چ بۆ گیانلەبەر و غەیری گیانلەبەر تەنیا یەکدانەی وەک ئەو هەیە.
 
ئەمانە ناوی تایبەتن:  ناوی مرۆڤەکان، ناوی وڵات، شار، شەقامەکان و ...
وەک:  ڕزگار، مێهرداد،هەژار و ... واتە ئێمە یەک ڕزگار و یەک مێهردادمان هەیە و یەک هەژار و ... بۆیە ناوی مرۆڤەکانە تایبەتە ناوی دیکەی تایبەت وەک: شنۆ، هەولێر، مەهاباد، بۆکان، سنە، کرماشان، ئیلام و دیاربەکر و بۆتان و بتلیس و کەرکووک و یا کێلەشین، قەندیل و ئاگری و... هەموو ناوی تایبەتن چونکە یەکدانەی وا هەیە. (ناتوانی ئەم ناوە تایبەتییانە تاک یان کۆ بکەی یاکوو ناسراو و نەناسراوی بکەی هەندێ جار بەهۆی زمانەوە بۆ ناوی وڵات و مرۆڤ ناسراو دەکرێ وەک:  کوردستانەکەم، کرماشانەکەم، ئەحمەدەکەم هات و ... کەچی ئەمە تەنیا زارە و ڕێزمانی نییە.)
 

پێنجەم: ناو لە ڕووی ناسینەوە:
-١- ناوی ناسراو:  بەو ناوە دەکوترێ کە بۆ بیسەر ناسراو بێ.  ئەم ناوە لە زمانی کوردیدا سێ نیشانەی هەیە کە دوو نیشانەی ئەکەوێتە کۆتایی ناوەکە و نیشانەیێکیش دێتە هەوەڵی ناو:
کـــە، ەکــە:  لە کۆتایی ناودا دێن. 
   کـە وەک:  چراکە، مامۆستاکە،  ەکــە👈وەک: ماڵەکە، ژنەکە، کوڕەکە، بزنەکە، گوڵەکە.
تێبینی/  
نیشانەی "ـەکە" دەکەوێتە دوای هەر ناوێک کە بە پیتی بێدەنگ کۆتایی هاتبێت
وەک: کتێب + ـەکە = کتێبەکە                         پێنووس + ـەکە = پێنووسەکە
تێبینی/
نیشانەی "کە " دەکەوێتە دوای ناوێک کە بە پیتی دەنگداری "ا" یا "ـە" تەواو ببێت
وەک:  برا + کە = براکە                   گەمە + کە = گەمەکە

تێبینی/
بەڵام ئەگەر ناوەکە بە پیتێ "ێ" ۆ"ی" کۆتایی هاتبێت پێش نیشانەی "ەکە" پیتی  "ی y" دەگرێت
وەک:  دێ👈دێ + ی + ەکە = دێیەکە                    ماسی👈 ماسی + ی + ەکە = ماسییەکە
        دۆ 👈 دۆ + ی + ەکە = دۆیەکە

تێبینی/
ئەگەر ناوەکە بە پیتی دەنگداری "وو" کۆتایی هاتبێت پێش نیشانەی "ـەکە" پیتی (و w) دەگرێت.
وەک :  توو 👈توو+ و + ەکە = توووەکە                  بەڕوو + و+ ەکە = بەڕوووەکە

ـ نیشانەی سێێەمی ناوی ناسراو جێناوی ئاماژە (ئیشاڕە) وەکوو  "ئەم"  "ئەو"  کە بە هاتنی ئەم نیشانانە پیتی "ـە"ش لە کۆتاییی ناوەکەوە زێدە دەکرێت
وەک:  ئەم + پیاو + ە = ئەم پیاوە، ئەم پیاوانە            ئەو + ژن + ـە = ئەو ژنە، ئەو ژنانە

ـ  ناوی ناسراوی کۆ
ناوی ناسراو لە زمانی کوردیدا بەهۆی نیشانەی کۆ ( ان) کۆ دەکرێ و لەگەڵ هیچ نیشانەی کۆی دیکەش سازگار نییە.
لە کاتی دروستکردنی ناوی ناسراوی کۆ دەبێت (ـە)ی کۆتایی(کە و ـەکە) بسڕینەوە و نیشانەی "ان"ی کۆی پێوە زێدە بکەین. واتا:   
         کوڕ + ەکە = کوڕەکە + ان = کوڕەکان                   ماڵەکە + ان = ماڵەکان     
            مامۆستاکە + ان = مامۆستاکان                      کچەکە + ان = کچەکان

٢- ناوی نەناسراو:  بەو ناوە دەکوترێ کە بۆ بیسەر ناسراو نەبێ ئەم ناوە لە زمانی کوردیدا دوو نیشانەی هەیە کە دەکەونە ئاخری ناوەکەوە.
نیشانەکانی  ێــک و ەک = وەک:  
کتێبێک یا کتێبەک           ژنێک یا ژنەک              کوڕێک یا کوڕەک             دڵێک یا دڵەک
ـ ئەگەریش بە " ا، ێ، ی، ۆ، ـە " کۆتایی هاتبێت ئەوە (ی)ی میانجی دەگرێت وەک:  
چرایێک، یا چرایەک          مامۆستـایێک یا مامۆستایەک     پەپوولـەیێک یا پەپوولەیە    
ماسیـیێک  یا ماسییەک           دێـیێک یا دێیەک               هەڵـۆیێک یا هەڵۆیەک
      

بەڵام ئەگەر وشەکە بە (وو) کۆتایی هاتبێت ئەوە یەک  "و"ی ناوجی دەگرێت
وەک:  (توووێک/توووەک) بەپێی ڕێنووس دەنووسرێت ( تووێک بەڕووێک یا بەڕووەک)

-ناوی نەناسراوی کۆ:
ناوی نەناسراو لە زمانی کوردیدا بەهۆی نیشانەی کۆی (ان) کۆ دەکرێت و لەگەڵ هیچ نیشانەی کۆی دیکەش سازگار نییە.
لە کاتی دروستکردنی ناوی نەناسراوی کۆ دەبێت سەرەتا کۆی بکەین دوا نیشانەی نەناسراوی "ێک یا یەک"  پێوە زێدە بکەین واتا:  
   کوڕ + ان + ێک/ەک = کوڕانێک/کوڕانەک      ماڵ + ان + ێک/ەک = ماڵانێک/ماڵانەک    
  مامۆستا + ی + ان + ێک/ەک  = مامۆستایانێک/مامۆستایانەک
 

شەشەم:  ناو لە ڕووی هەبوونەوە:

-١- ناوی بەرجەستە:  هەر کات ناوێک وەبەر یەکێک لە پێنج هەستەکانی (ساوایی، بیسایی، بۆنایی، چێشتن و دیتن) بکەوێ و بوونی سەربەخۆیان هەبێت. واتا بەو ناوە دەڵێن کە سەربەخۆ دەبیندرێ و دەناسرێ یانی بێیارمەتی ناوێکی دیکە بۆ بیسەر بناسرێ و هەست پێ بکرێ.
وەک:  کێو، دار، دەرکە، دەلاقە، خۆڵ یا خاک، کێو، گوڵ، با، مافوورە، تەلەفوون، قەند و قوتابخانە، ئەڵڵا (الله) ، هەوا، ئۆکسیژێن، کتێب، دووکەڵ، شار، شنۆ، ئەحمەد، پیاو، ژن، منداڵ، باران، بەفر و ...
کە ئەمانە لە بیری ئێمەدا هەن و دەبینرێن و دەتوانین سەیرییان بکەین واتە بەر هەست دەکەوێ.
 بەڵام ناوی خوا و جێگە و شتەکانی سروشتی ناوی سەربەخۆن وەکوو:  جن، فرشتە، شەیتان و ....
•ناوی کۆمەڵ ناوی بەرجەستەن

٢- ناوی واتایی:  ناوێکە کە لە خۆیدا بوونی سەربەخۆی نییە بەڵکوو لە هزر و خەیاڵدا دەبێت و وەبەر هیچ یەک لە هەستەکانی مرۆڤ ناکەوێ. واتا بەو ناوانە دەوترێ کە لە هزر و مێشکی ئێمەدا هەن و نابینرێن، ناناسرێن و بەیارمەتی ناوێکی دیکە دروست دەبن.
وەک:  بیر، تاریکی، جوانی، ناحەزی، ئەوین، شیرنی، تاڵی، ئازایی، پیاوەتی، عەقڵ و ...
  کە ئەمانە نابینرێن و بەستراوەتەنەوە بە شتێکی دیکە یانی جوانی بە گوڵ و شیرنی بە قەند و ... هەر یەکەی بەتەنیا وەبەر هەستەکان ناکەوێت.
•ڕەوشتەکان ناوی واتایین.
(ڕەنگە بڵێی کە شیرینی بەر هەستی تام دەکەوێ بەڵێ وایە بەڵام شیرینی خۆی تامه واتە تۆ ناتوانی شیرینی و تاڵی ببینیت و هەڵبگری بەڵکوو تۆ شەکر، قەند یا کەکرە دەبینی و تام دەکەی کە شیرین و تاڵن.)
 
ناوی واتایی: 
-بنجی: ناویکە کە لە بنەڕەتدا ناوێکی واتایییە و بۆ ئەم مەبەستە دانراوە.
 وەکوو: هۆش، شەرم، ڕەنج، گیان، تاریک.
-نابنجی: ئەو ناوانەن کە لە بنەڕەتدا مادی یان بەرجەستەن، بەڵام بەهۆی پاشگرەوە دەبنە ناوی واتایی.
جۆرەکانی دروستکردنی ناوی واتاییی نابجی:
-ناو+ پاشگرەکانی (ی، ەتی، یەتی، ێتی، تی، یی، ە، ایەتی)
برا+ یەتی = برایەتی                 کورد+ ایەتی = کوردایەتی

-هاوەلناو+ پاشگرەکانی (ی، ەتی، یەتی، ێتی، تی، یی، ە، ایەتی)
چاک+ ە = چاکە          درێژ+ یی = درێژیی              برسی+ ێتی = برسێتی
-قەدی چاوگ + ار
           مرد+  ار = مردار              کرد+ ار = کردار

-ڕەگی چاوگ+ ە         -----   پرس+ ە = پرسە      

-ڕەگی چاوگ+ ی       -----  دز + ی = دزی         
نام
ایمیل (منتشر نمی‌شود)
وبسایت
:) :( ;) :D ;)) :X :? :P :* =(( :O @};- :B :S
کد امنیتی
رفرش
کد امنیتی
نظر خصوصی
مشخصات شما ذخیره شود ؟ [حذف مشخصات] [شکلک ها]

خرید اشتراک ویژه